Mitrovicë, 27 shkurt 2017

Grupe nxënësish të shkollave të mesme në Mitrovicë, sot për së afërmi kanë vizituar objektet policore në kuadër të Drejtorisë Rajonale në Mitrovicë.

Kjo vizitë u realizua në frymën e bashkëpunimit të ndërsjellë ndërinstitucional dhe qasjes aktive ndërmjet Policisë dhe institucioneve të edukimit, me ç’rast grupin e nxënësve në një takim e priti edhe Drejtori Rajonal i Policisë N/Kolonel Nehat Thaqi, i cili shprehi gatishmërinë dhe përkushtimin e vazhdueshëm në qasje te përbashkët në identifikimin dhe zgjidhjen e problemeve në mbështetje me mekanizmat tjerë ndërinstitucional.

Përveç angazhimeve të vazhdueshme në ofrim të sigurisë në shkolla, që nga fillimviti shkollor 2016/17, Polica mbi konceptin e identifikimit të paralajmërimit të hershëm, në vazhdimësi ka realizuar aktivitetet në fushën e edukimit, sensibilizimit, të dukurive negative nëpër shkolla, përfshirë sjelljet asociale, rreziku dhe pasojat nga substancat narkotike, si dhe krimet kibernetike.

Interesimi i nxënësve për të vizituar Policinë njëkohësisht përmbush edhe objektivat e tyre që buronin nga perspektiva e ligjëratave të mëhershme të zhvilluara nga Policia.

Gjatë vizitës së nxënësve në Polici ata janë njoftuar për punën policore, hapësirat e punës në objektin policor, qendrën e komunikimit, njëkohësisht zyrtarët policorë u kanë ofruar informacione për punën rutinore policore, si dhe njohuri elementare për thirrjet emergjente, dërgimin e informacionit me kohë në fushën e parandalimit të hershëm etj.Gjithashtu nxënësve u është shpjeguar edhe për të drejtat dhe përgjegjësitë e të miturve.

Nxënësit gjatë vizitës pasqyruan njohuri të kënaqshme për punën, rolin e Policisë në fushën e sigurisë, si dhe rëndësinë e qasjes së përbashkët në parandalimin e incidenteve në shkolla dhe për siguri publike.